DÄT SEELTER BAALSLOON

Dät Baalsloon mout fröier in Seelterlound Nationalsport weesen hääbe. Foar n hunnert Jier waas dät wäil bolde uutstuurwen, man glukkelk hääbe Minssen un Bröring doomoals fäästlaid, woo dät soowät tougeen. Doo bee Schrieuwere sunt oawers nit alleweegense düütelk un stimme uk nit immer mädnunner. Ik hääbe deeruum doo Bee touhoopenuumen un fersoacht deeruut Spielräägele touhoopetoustaalen. Ik reeke doo hier, in ju Hoopenge, dät sik dät Spil uk däälich noch spielje lät.

Dät Spielfäild is hier bie teekend. Dät schäl Gäärslound weese, man et wuud fröier uk wäil ap n Wai spield. Ju "Stoite" is ne litje floote Doabe in de Gruund af n Plonke ju in de Gruund iengreeuwen is. Dät "Poark" is n Twäärsstriep un di "Kat" is n Holtblok in Grööte fon n Baksteen. Fon doo Katte mout et soogen Stuk reeke.

Älke Monskup bestoant ut säks Spielere. Eerste wad deeruum looted, wäkke Monskup ju oungriepende (A) weese schäl. Joo gunge bie ju Bääterlienje stounde, wilt ju ferdäägenjene Monskup (B) sik "unner" ferdeelt. Doo Spielere schällen binne doo Lienjen blieuwe; älke Monskup ap hiere Siede fon dät Poark.

Die Baal häd säks bit soogen cm Truchmäite un mout goud stoitje konne. Fröier bruukten joo n wullen Kljoun mäd Leeder uurleeken, man n Tennisbaal mout dät uk goud dwoo konne.

As dät Spil ounfangt, gungt die eerste Spieler fon Monskup A bie de Stoite stounde. Hie lät dän Baal ap de Stoite stoitje un haut dän Baal, wan er wier uumhoochfljucht, mäd de flakke Hounde ätter Monskup B.

Ju Monskup B mout nu fersäike, dän Baal in de Flucht af int Aphupjen tourääch tou sloon un soo fljucht die Baal wai un wier. Dät lät wäil n bitjen ätter Tennis, man dät mout aal mäd de flakke Hounde. Wäl neen Ielt nouch in de Hounde häd, duurt ne leederne Wonte af Handske bruuke.

Wan di Baal unner deel kumt un nit moor aphuppet, dän mout me him rulje läite. Wier hie lääsen blift, deer lait me n Kat deel. Die Baal wäd wier ätter de Stoite smieten un dan mout die naiste Spieler fon Monskup A sloo. Soo gungt dät de Riege ätter un foar älke goude Sleek kumt unner n Kat tou lääsen.

Et gungt deeruum, dän Kat muugelkst wied tou kriegen. Deeruum fersäkt die Slooer ätter n Steede wai tou sloon, wier juust naan Spieler fon Monskup B stoant. Un wan dät n gjucht gouden Slooer is, dän glukket him dät fielicht un haue dän Baal uur doo Juunspielere häär. Deeruum is de Laangte fon dät Fäild uk nit ounroat; dät honget juust deerfon ou, woo wied der sloain wäd.

Man dät kon uk weese, dät die Baal gans fäl fon ju Monskup B tourääch sloain wad, dät hie uur de Bääterlienje stuft. Dän is er "bääte" un deerfoar kricht ju Monskup B fieuw Punkte. Ju Monskup A däd deeruum alles uum dän Baal tou mäiten, man joo duuren dät uk bloot in de Flucht af int Aphupjen dwoo.

Sunt aal säks Spielere an de Riege weesen, dan wäide doo Katte wächnuumen, uutgenuumen die Fierste. Dan wikselje joo: Monskup A kumt unner un Monskup B gungt ätter buppen, ätter de Stoite. Monskup B wäd nu ju oungriepende Paatäi un mout fersäike hiere Katte fääre tou kriegen äs di Fierste fon Monskup A.

Ju Monskup, ju dän fierste Kat häd, kricht tjoon Punkte af n "Tjoon". Un ju Monskup, ju dät eerste fieuw-un-trüütich häd, ju häd dät wonnen. Dan fieuw-un-trüütich is n Spil.

Wan bie dät Sloon fon de Stoite häär die Baal uur doo Siedenlienjen fljucht, dan is er "buute". Dät is n Puudel un dan mout die Spieler dän Foulgjende Plats reeke. Dätsalge jält, wan di Baal nit uur dan Poark sloain wäd un buppe deel kumt.

Dät Baalspil is wäil ju seelter Takke fon n Oard Baalspiele, doo foar n twoohunnert Jiere algemeen spield wuuden un wier uk Tennis fon oulat is. Dät Woud "Kat" honget fielicht touhoope mäd ängelsk "to catch" (fange).

Dät Ienleedende fon disse seelter Sport is, dät der bee individuelle Elemente (dät Apsloon bie de Stoite) un wäkke fon Touhoope-Oarbaid (dät Mäiten fon dän Baal) oane sitte.

PK 23.4.1983
[Das saterländische Ballspiel. Zusammenfassung der Spielregeln.]